گوجرانوالہ میں بارش، سردی کی لہر دوبارہ حاوی، بے گھر افراد کے لیے مشکلات میں اضافہ
گوجرانوالہ میں بارش، سردی کی لہر دوبارہ حاوی، بے گھر افراد کی مشکلات میں اضافہ
گوجرانوالہ کے مختلف علاقوں میں وقفے وقفے سے ہونے والی بارش کے بعد ایک بار پھر سردی کی شدت میں اضافہ ہو گیا ہے۔ بارش کے باعث موسم سرد اور مرطوب ہو چکا ہے جبکہ ٹھنڈی ہواؤں نے شہریوں کو گھروں تک محدود کر دیا ہے۔ محکمہ موسمیات کے مطابق آئندہ چند روز کے دوران سردی کی یہ لہر برقرار رہنے کا امکان ہے، جس کے باعث درجہ حرارت مزید کم ہو سکتا ہے۔
بارش اور سرد موسم نے جہاں عام شہریوں کی روزمرہ زندگی کو متاثر کیا ہے وہیں کھلے آسمان تلے زندگی گزارنے والے بے گھر افراد کے لیے حالات مزید مشکل ہو گئے ہیں۔ فٹ پاتھوں، بس اڈوں، پلوں کے نیچے اور سڑکوں کے کنارے رہائش پذیر افراد شدید سردی اور بارش کا سامنا کر رہے ہیں، جن کے پاس نہ مناسب لباس ہے اور نہ ہی بارش سے بچاؤ کے وسائل۔
سماجی حلقوں کا کہنا ہے کہ موجودہ صورتحال میں ضلعی انتظامیہ اور فلاحی اداروں کی جانب سے فوری اقدامات کی اشد ضرورت ہے، تاکہ بے گھر اور نادار افراد کو عارضی پناہ، گرم کپڑے اور ضروری سہولیات فراہم کی جا سکیں۔ شہریوں نے بھی مخیر حضرات سے اپیل کی ہے کہ وہ اس مشکل وقت میں ضرورت مندوں کی مدد کے لیے آگے آئیں۔
شہریوں کی جانب سے سوشل میڈیا پر بھی اس صورتحال پر تشویش کا اظہار کیا جا رہا ہے اور مطالبہ کیا جا رہا ہے کہ سرکاری سطح پر ہنگامی اقدامات کیے جائیں۔ اس موقع پر عوام کی جانب سے خصوصی دعائیں بھی کی جا رہی ہیں۔
یا اللہ! جو لوگ بے گھر ہیں اور کھلے آسمان تلے زندگی گزارنے پر مجبور ہیں، اُن کی حفاظت فرما، اُن کی آزمائش میں آسانی عطا فرما اور اُن پر اپنی خاص رحمت نازل فرما۔ آمین۔
About the Author
