ہانگ کانگ کے علاقے تائی پو میں خوفناک آتشزدگی، 36 افراد ہلاک، 279 لاپتہ

تائی پو کے رہائشی علاقے میں واقع وانگ فُک کورٹ کی بلند و بالا رہائشی عمارتوں میں لگنے والی ہولناک آگ میں کم از کم 36 افراد ہلاک ہوگئے ہیں، جب کہ 279 افراد تاحال لاپتہ ہیں۔ حکام کے مطابق آگ کو ہانگ کانگ کی تاریخ کے سنگین ترین واقعات میں شمار کیا جا رہا ہے۔
بی بی سی کے مطابق آگ بجھانے کے لیے 800 سے زائد فائر فائٹرز موقع پر موجود ہیں، اور ہانگ کانگ کے چیف ایگزیکٹو جون لی نے تصدیق کی ہے کہ آگ آہستہ آہستہ قابو میں آ رہی ہے۔ تاہم رات کے باعث ریسکیو آپریشن میں مسلسل مشکلات پیش آ رہی ہیں۔
مقامی کونسلر کے مطابق متعدد رہائشی اپنے پیاروں سے رابطہ نہ ہونے پر حکام سے مدد کی اپیل کر رہے ہیں۔ عمارتوں کے اندر پھنسے افراد کی تلاش کے لیے فائر فائٹرز بلند منزلوں تک رسائی کی کوشش کر رہے ہیں۔
آگ کو لیول فائیو یعنی سب سے شدید درجے کی آتشزدگی قرار دیا گیا ہے۔ ہانگ کانگ میں اس سطح کی آخری آگ 17 سال قبل لگی تھی۔مقامی میڈیا نے بتایا کہ عمارتوں کے اندر سے دھماکوں کی آوازیں بھی سنائی دیں اور فائر برگیڈ کو بلند منزلوں تک پہنچنے میں مشکلات کا سامنا ہے۔
سیکریٹری برائے سیکیورٹی تانگ پنگ کیونگ نے کہا ہے کہ ایک ایمرجنسی مانیٹرنگ اور سپورٹ سینٹر قائم کردیا گیا ہے تاکہ آتشزدگی کے اثرات کا جائزہ لیا جا سکے۔ حکام کے مطابق آگ کے پھیلنے کی رفتار ’’غیر معمولی‘‘ تھی۔
عمارتوں میں اُس وقت مرمت اور تزئین و آرائش کا کام جاری تھا، اور بیرونی حصے پر بانس کی اسکیفولڈنگ لگی ہوئی تھی، جس سے آتشزدگی مزید شدید ہونے کا خدشہ ظاہر کیا جا رہا ہے۔
سینکڑوں افراد کو عارضی شیلٹرز میں منتقل کر دیا گیا ہے، جب کہ جن رہائشیوں کے گھر مکمل طور پر متاثر ہوئے ہیں، انہیں ایمرجنسی ہاؤسنگ یونٹس فراہم کیے جا رہے ہیں۔

About the Author

Naeeb Ahmed

Administrator

Visit Website View All Posts