ریاض: سعودی قیادت میں قائم اتحادی افواج نے سعودی عرب پر حوثیوں کے حالیہ میزائل اور ڈرون حملوں کے بعد بھرپور جواب دینے کا اعلان کردیا ہے۔
اتحادی افواج کے ترجمان میجر جنرل ترکی المالکی کے مطابق حوثیوں کی جانب سے شہریوں اور شہری املاک کو نشانہ بنایا گیا۔ انہوں نے کہا کہ اتحادی افواج سعودی عرب کی خودمختاری، شہریوں اور شہری تنصیبات کے تحفظ کے لیے تمام ضروری دفاعی اور عملی اقدامات کریں گی اور حملوں کا ذمہ داری کے ساتھ سخت جواب دیا جائے گا۔
سعودی اتحاد کے مطابق حالیہ بیلسٹک میزائل اور ڈرون حملوں میں 13 شہری زخمی ہوئے جبکہ متعدد رہائشی مکانات اور گاڑیوں کو بھی نقصان پہنچا۔
حوثیوں نے سعودی عرب کے کنگ خالد ایئر بیس کو بیلسٹک میزائلوں اور ڈرونز سے نشانہ بنانے کا دعویٰ بھی کیا ہے، تاہم اس مخصوص دعوے کی آزاد ذرائع سے تصدیق سامنے نہیں آئی۔
سعودی اتحاد کے تازہ بیان کے بعد سعودی عرب اور یمن کے حوثیوں کے درمیان کشیدگی میں مزید اضافے کا خدشہ ظاہر کیا جا رہا ہے۔ خطے میں جاری صورتحال کے باعث بحیرہ احمر اور اہم بحری تجارتی راستوں کی سکیورٹی بھی ایک مرتبہ پھر توجہ کا مرکز بن گئی ہے۔
About the Author
