صدر آصف زرداری سے فلپائن کی سابق صدر لوریا مکپاگال کی ملاقات

Published: November 13, 2025 | Updated: November 13, 2025

صدر مملکت آصف علی زرداری سے فلپائن کی سابق صدر اور رکن پارلیمان گلوریا مکپاگال کی ملاقات

ایوان صدر کے پریس ونگ سے جاری بیان کے مطابق اس موقع پر صدرمملکت نے کہاکہ پاکستان اور فلپائن 7 دہائیوں پر محیط دوستی اور تعاون کے رشتے میں بندھے ہیں۔انہوں نے 2022 کے دفاعی تعاون کے معاہدے کو ایک سنگِ میل قرار دیتے ہوئے فلپائن کو 2026 میں آسیان چیئرشپ سنبھالنے پر مبارکباد دی۔

’’این این آئی ‘‘ کے مطابق صدر مملکت نے فلپائن کی جانب سے پاکستان کی آسیان شمولیت کے لئے حمایت کو سراہا اور فلپائن میں حالیہ زلزلے اور طوفانوں میں جانی و مالی نقصان پر اظہارِ ہمدردی کرتے ہوئے کہا کہ پاکستان مشکل وقت میں فلپائن کے عوام کے ساتھ کھڑا ہے۔صدر مملکت نے ماحولیات اور لاس اینڈ ڈیمیج فنڈ کے قیام میں فلپائن کے کردار کو سراہا اور خوراک اور ادویات کے شعبوں میں تجارتی تعلقات بڑھانے پر زور دیا۔
صدر آصف علی زرداری نے کہا کہ نجی شعبے کے درمیان تعاون بڑھانے کی ضرورت ہے۔انہوں نے فلپائن کی طرف سے پاکستانیوں کو طویل مدتی رہائشی اجازت نامہ دینے کے فیصلے کو سراہا۔

اس موقع پر گلوریا مکپاگال نے پاکستان کے ساتھ تجارت، دفاع اور عوامی روابط میں تعاون بڑھانے کے عزم کا اظہار کیا۔انہوں نے پاکستان میں دہشت گرد حملوں میں جانی نقصان پر افسوس کا اظہارِ کیا۔گلوریا مکپاگال نے کہا کہ ان کے والد نے 1959 میں پاکستان کا بطور صدر فلپائن دورہ کیا تھا۔پاکستان اور فلپائن کے درمیان دیرینہ احترام اور دوستی کے تعلقات قائم ہیں۔ پاکستان دنیا کے پانچویں بڑے ملک کی حیثیت سے گلوبل ساتھ میں قائدانہ کردار ادا کرے۔
ملاقات میں فلپائن کے سفیر امینیوئل فرنانڈیز بھی موجود تھےجبکہ چیئرمین سینیٹ سید یوسف رضا گیلانی، سینیٹر شیری رحمان اور سینیٹر سلیم مانڈوی والا بھی ملاقات میں شریک تھے۔